The commemorative column of Obelisco dos Cantóns

O Obelisco dos Cantóns é un monumento da cidade da Coruña, situado na rúa do Cantón Grande. Construíse en 1895 en memoria de Aureliano Linares Rivas, deputado, senador e ministro compostelán durante a rexencia de María Cristina. A denominación de obelisco, que lle deron, é inexacta, pois o monumento é en realidade unha columna conmemorativa.

En 1893 o concello coruñés creou un comité ad hoc, que decidiu que o monumento non só constituíse unha homenaxe a Linares Rivas, senón que ao tempo tivese utilidade pública, cun reloxo e aparellos meteorolóxicos. O monumento foi proxectado polo mestre de obras Gabriel Vitini Alonso, e a cimentación polo arquitecto municipal Antonio de Mesa. Isto debeuse a que a cimentación foi pagada polo concello coruñés, en tanto que o monumento en si foi erguido a partir da recadación obtida por subscrición popular, e os mestres de obra eran os que proxectaban a maioría de obras privadas nesa época. O monumento foi feito polo construtor José Escudero, que cobrou 1.995 pesetas. Foi inaugurado o 10 de febreiro de 1895.

Na base deste obelisco están gravados en placas de bronce os datos xeográficos e os climáticos extremos da cidade. En 1952, o alcalde Alfonso Molina decidiu aumentar a altura da estrutura xa que os edificios da zona medraran en altura e desmerecían o monumento.

Sources: Wikipedia, OpenStreetMap, Wikidata, Wikimedia Commons